Metro

Wazobia FM Dey Celebrate 10 Years Of Ogbonge Broadcasting For Pidgin

Wazobia FM, your Ogbonge radio station dey celebrate deir 10th anniversary and na for 2007 dem start am. Na di first Pidgin Radio station for Nigeria and e be one of di radio stations wey dey popular for di country.

Wazobia FM get other frequencies wey be 95.1, 94.1, 99.5 and dem dey broadcast for other states –Abuja, Port Harcourt and Kano.  For di short time wey di radio station start, na Wazobia FM dey control di airwaves. For restaurants, hospitals, schools, offices, motor parks, markets, na wetin everybody dey listen to.

Wazobia FM Aka “Di People’s Station” get plenty ogbonge shows wey dey totori people, some of dis shows be Make ‘Una WakeUp’, ‘Oga Madam Office’, ‘Kulele Zone’, ‘Evening Oyoyo’, ‘Skentele Sunday’, ‘Love Wantintin’,  ‘SatideParipa’ and others. All dis shows dey get local and international news, hot gist, current affair issues, and everything wey concern entertainment. Di radio station dey play plenti popular music and dem dey both on air and online 24/7.

Di OAPs for Wazobia FM be some of di best for di country; Yaw, Lolo 1, Cheche, Igos, Mayowa, OPJ, Twitwi, Femi, Bunor, KBaba, Dwana, Ira, Uzo, Kody, Nedu, Ogbolor, Ikechukwu and others. Deir shows be one of di radio programs wey people dey listen to pass all over di country because dem dey very  informative, entertaining and funny.

Di radio station get correct digital presence and deir social media following stand gidigba, you fit listen to any radio show from any part of di world. Over di last ten years, Wazobia FM don grow and di quality of deir radio programs don improve.