We dey wish our ogbonge talk talk radio person Uzo Margaret AKA Uzo… a happy birthday. Uzo wey be one of the big voice behind your ogbonge program – Kulele Zone wey dey always happen between 3:00pm – 6:00 pm every week from Monday – Friday on top our ogbonge radio station Wazobia FM lagos, celebrate her day with students of St Martins Nursery and Primary School, Danmegro street for inside Mushin, as she take deliver her new project of ‘Sick Bay’ for the students, on her number 3 Edition of the ‘Uzo Goes To School’ project.
As the year dey waka pass, Uzo wey be beta person apart from wetin she like to dey do wey be talk talk on top radio, come out kajad say she wan support the government to make our pikin dem school beta place wey dem fit to stay read book, dat nah why she bring this her beta beta sense with her project wey she call ‘Uzo Goes To School’. For this project, she dey help our children with fine fine things like Tiles for the ground for our children class room, sick bay in case any of our pikin dey sick, beta fan wey go dey blow beta breeze for them body, double bunk bed, toilet, bed and pillow, bread spread and pillow case, and plenty plenty beta with the help of beta people wey dey support and sponsor her project.
Make una join us wish her many more years with strong strong energy to take build plenti plenti betament for naija people, on top radio and everywhere.